Presidenti i Shteteve të Bashkuara, Donald Trump, ka njoftuar arritjen e një marrëveshjeje që synon çarmatosjen e Hamasit dhe hapjen e rrugës për tërheqjen graduale të forcave izraelite nga Rripi i Gazës. Megjithatë, deklaratat e palëve tregojnë se zbatimi i planit mbetet i pasigurt.
Sipas administratës amerikane, Hamasi ka pranuar, përmes ndërmjetësve, një plan që parashikon dorëzimin e armëve dhe transferimin e kontrollit politik e ushtarak të Gazës te Komiteti Kombëtar për Administrimin e Gazës, një administratë teknike palestineze. Në këmbim, Izraeli do të tërhiqte gradualisht trupat e tij nga territori.
Hamasi dhe Izraeli mbajnë qëndrime të kundërta
Megjithatë, një përfaqësues i Hamasit, Ghazi Hamad, deklaroi për Al Jazeera se grupi nuk do të ndërmarrë asnjë hap për çarmatimin derisa Izraeli të përfundojë tërheqjen nga Gaza.
Nga ana tjetër, media izraelite, duke cituar burime zyrtare, raportojnë se qeveria izraelite nuk është e gatshme të tërhiqet nga asnjë pjesë e Gazës përpara çarmatimit të plotë të Hamasit.
Edhe deklaratat e presidentit Trump në platformën Truth Social lënë të kuptohet se tërheqja e forcave izraelite do të ndodhë vetëm pasi procesi i çarmatimit të ketë përfunduar.
Trump: Hap monumental drejt paqes
Trump e cilësoi marrëveshjen si një zhvillim historik.
“Kjo është një marrëveshje historike për çarmatimin e plotë të Hamasit dhe të gjitha grupeve të tjera të armatosura në Gaza. Është një hap monumental drejt paqes dhe sigurisë së qëndrueshme”, shkroi ai.
Plani parashikon që çarmatimi të zhvillohet në disa faza, ndërsa forcat izraelite të zëvendësohen gradualisht nga një forcë ndërkombëtare stabilizimi, e cila do të bashkëpunojë me një polici të re palestineze.
Zbatimi pritet të zgjasë deri në tetë muaj
Zyrtarët amerikanë bëjnë të ditur se udhërrëfyesi është rezultat i negociatave njëmujore me ndërmjetësimin e Egjiptit, Katarit dhe Turqisë, ndërsa zbatimi i tij mund të zgjasë 200 deri në 250 ditë.
Ata theksuan se prioritet nuk do të jetë shpejtësia, por përmbushja e hapave të verifikueshëm nga të dyja palët.
Sipas planit, administrimi i Gazës do t’i kalojë institucioneve të reja palestineze, ndërsa një forcë ndërkombëtare do të mbikëqyrë sigurinë, procesin e çarmatimit dhe trajnimin e një policie të re palestineze.
Ende shumë paqartësi
Pavarësisht optimizmit të Uashingtonit, mbeten të pazgjidhura një sërë çështjesh, përfshirë përbërjen e administratës së re palestineze, vendet që do të kontribuojnë me trupa në misionin ndërkombëtar dhe mënyrën e zbatimit të njëkohshëm të çarmatimit dhe tërheqjes së ushtrisë izraelite.
Ndërkohë, zyrtarët amerikanë pretenduan gjithashtu se Irani kishte ushtruar presion mbi Hamasin që të mos pranonte marrëveshjen, por sipas tyre, grupi palestinez vendosi të vazhdonte negociatat.
Në këtë fazë, marrëveshja përfaqëson një kornizë politike për procesin e ardhshëm. Megjithatë, për shkak të mospajtimeve mbi rendin e zbatimit dhe mungesës së konfirmimit përfundimtar nga Izraeli, mbetet e paqartë nëse plani do të materializohet sipas afateve të parashikuara. Burimi: Corriere.
