Presidenti i Shteteve të Bashkuara, Donald Trump, ka lëshuar kritika të forta ndaj kryeministres së Italisë, Giorgia Meloni, duke e akuzuar për mungesë mbështetjeje në përballjen me Iranin dhe krizën në Lindjen e Mesme.
“Jam i tronditur nga Meloni”
Në një intervistë për Corriere della Sera, Trump u shpreh i zhgënjyer nga qëndrimi i Italisë.
“Jam i tronditur. Mendoja se kishte guxim, gabova”, deklaroi ai, duke shtuar se Italia po refuzon të përfshihet në përpjekjet për të garantuar sigurinë energjetike dhe për të përballuar krizën në Ngushticën e Hormuzit.
Sipas tij, Roma po mbështetet te SHBA për të mbajtur të hapura rrugët energjetike, pavarësisht varësisë së saj nga nafta që kalon në këtë zonë.
Kritika për NATO-n dhe Europën
Trump nuk kurseu kritikat as ndaj NATO, duke e cilësuar aleancën si “një tigër prej letre”.
Ai theksoi se disa vende europiane, përfshirë Italinë, nuk janë të gatshme të kontribuojnë në operacionet ushtarake, edhe pse përfitojnë nga mbrojtja dhe stabiliteti që sigurojnë SHBA-të.
Presidenti amerikan shtoi gjithashtu se politikat e emigracionit dhe energjisë po e “shkatërrojnë Europën nga brenda”.
Sulm edhe ndaj Papës
Në intervistë, Trump ka kritikuar ashpër edhe Papa Leone, duke deklaruar se ai “nuk e kupton çfarë po ndodh në Iran”.
Sipas tij, Papa nuk duhet të komentojë çështje lufte, pasi “nuk ka ide për situatën reale”, duke iu referuar tensioneve dhe zhvillimeve të fundit në rajon.
Raportet në ftohje
Trump zbuloi gjithashtu se nuk ka pasur kontakte të fundit me Melonin, duke theksuar se marrëdhënia mes tyre ka ndryshuar ndjeshëm krahasuar me më parë, kur ai e kishte cilësuar si një aleate të fortë.
Deklaratat e tij vijnë në një moment tensioni të lartë ndërkombëtar, ku përçarjet mes aleatëve perëndimorë po bëhen gjithnjë e më të dukshme përballë krizës në Lindjen e Mesme.
