Presidenti i Shteteve të Bashkuara të Amerikës, Donald Trump, deklaroi se ndërhyrja ushtarake kundër Iranit ishte një veprim i domosdoshëm për të parandaluar një konflikt shumë më të madh global, madje edhe një luftë të tretë botërore.
Duke folur nga Zyra Ovale, Trump theksoi se nuk është pro luftërave, por sipas tij rreziku nga programi bërthamor iranian ishte i menjëhershëm dhe serioz. Ai paralajmëroi se nëse Irani do të siguronte armë bërthamore, përdorimi i tyre do të ishte vetëm çështje kohe, duke shtuar se ndërhyrja amerikane ishte e vetmja mënyrë për të shmangur një përshkallëzim katastrofik.
Presidenti amerikan pretendoi gjithashtu se Irani kishte përgatitur raketa për sulme ndaj vendeve të rajonit, duke përmendur Arabinë Saudite, Kuvajtin, Bahreinin dhe Emiratet e Bashkuara Arabe si objektiva të mundshëm. Sipas tij, këto plane përbënin një kërcënim të drejtpërdrejtë për stabilitetin në Lindjen e Mesme.
Sa i përket zhvillimeve të fundit në udhëheqjen iraniane, Trump tha se ekziston paqartësi për fatin e liderit të ri suprem, Mojtaba Khamenei, duke theksuar se nuk është e qartë nëse ai është ende gjallë dhe se mungesa e informacionit e bën situatën edhe më të ndërlikuar.
Në të njëjtën kohë, ai kritikoi aleatët për mungesë angazhimi në garantimin e sigurisë në Ngushticën e Hormuzit, duke kërkuar që vendet që varen nga kjo rrugë jetike për furnizimin me naftë të kontribuojnë më shumë. Trump paralajmëroi se mund të publikojë edhe emrat e vendeve që, sipas tij, nuk kanë bërë mjaftueshëm.
I pyetur për kohëzgjatjen e konfliktit, presidenti amerikan u shpreh se lufta nuk do të zgjasë shumë dhe se mund të përfundojë së shpejti. Ai e përshkroi situatën si një “lojë shahu në nivel shumë të lartë”, duke theksuar se përballja aktuale është mes fuqive të mëdha dhe me pasoja globale.
