Ankara do të jetë këtë javë mikpritëse e Samitit të NATO-s, ku do të marrin pjesë liderë nga mbi 40 vende, që përfaqësojnë një prodhim ekonomik të kombinuar prej rreth 70 trilionë dollarësh. Samiti do të zhvillohet të martën dhe të mërkurën, duke e vendosur Turqinë në qendër të diskutimeve për sigurinë dhe bashkëpunimin ekonomik në rajon.
Kreu i Dhomës së Tregtisë së Stambollit (ITO), Sekib Avdagiç, tha për Anadolu se samiti do të dëshmojë rolin gjithnjë e më të rëndësishëm të Turqisë në arkitekturën e sigurisë evropiane dhe transatlantike.
Sipas tij, rritja e ndikimit ndërkombëtar të Turqisë lidhet ngushtë me zhvillimin e industrisë së saj të mbrojtjes gjatë dy dekadave të fundit.
Një nga aktivitetet kryesore të samitit do të jetë Forumi i Industrisë së Mbrojtjes të NATO-s (NSDIF26), i cili nis në ditën e parë të takimit dhe konsiderohet ngjarja më e rëndësishme e Aleancës në fushën e prodhimit, investimeve dhe inovacionit në industrinë e mbrojtjes.
Avdagiç theksoi se forumi do ta vendosë industrinë turke të mbrojtjes në qendër të bashkëpunimit ushtarak ndërkombëtar. Ai kujtoi gjithashtu deklaratën e sekretarit të përgjithshëm të NATO-s, Mark Rutte, sipas së cilës rreth 3.000 kompani turke të mbrojtjes operojnë në kuadër të aleancës.
Ai veçoi edhe rolin e Teknopark Istanbul, i themeluar në vitin 2010 në bashkëpunim me Agjencinë e Industrisë së Mbrojtjes të Turqisë (SSB), duke theksuar se ky qendër inovacioni ka kontribuar ndjeshëm në zhvillimin e teknologjisë dhe prodhimit ushtarak në vend.
“Qindra kompani të kërkimit dhe zhvillimit (R&D) dhe mijëra inxhinierë po ndërtojnë të tashmen dhe të ardhmen e industrisë së mbrojtjes turke. Ne do të vazhdojmë të mbështesim çdo hallkë të këtij ekosistemi”, deklaroi Avdagiç.
Samiti i NATO-s pritet të shërbejë jo vetëm si një platformë për diskutime mbi sfidat globale të sigurisë, por edhe si një mundësi për forcimin e bashkëpunimit ekonomik dhe teknologjik ndërmjet vendeve anëtare dhe partnere.
