Paralajmërimi i kryeministrit polak, Donald Tusk, vjen pasi Varshava vendosi të mbyllë përkohësisht hapësirën e saj ajrore, të vërë në gatishmëri avionët luftarakë dhe të pezullojë operacionet në aeroporte, në përgjigje të sulmit të fundit rus.
Duke folur para parlamentit polak, Tusk tha se agjencitë perëndimore të inteligjencës kanë konfirmuar se presidenti rus, Vladimir Putin, po përgatitet për një konflikt më të gjerë.
“Ne e dimë se ai po planifikon diçka të keqe. Megjithatë, detyra më e rëndësishme për ne është të përgatitemi për skenarë të ndryshëm. Ne nuk do t’i pranojmë me naivitet mesazhet se Rusia ka vullnet të mirë dhe se do të fillojë të sillet siç duhet. Nuk ka asnjë tregues për këtë”, tha kryeministri polak.
Tusk argumentoi se informacioni në dispozicion të agjencive perëndimore të inteligjencës është “shumë i qëndrueshëm dhe bindës”.
Ai paralajmëroi gjithashtu se Moska, në të ardhmen, mund t’i paraqesë sulmet e saj si “aksidente”, me qëllim testimin e vendosmërisë dhe reagimit të NATO-s.
