Universiteti “Haxhi Zeka” në Pejë ka vazhduar procesin e hartimit dhe finalizimit të Planit Strategjik 2026-2030, duke zhvilluar ditën e dytë të punimeve kushtuar përcaktimit të prioriteteve zhvillimore dhe objektivave strategjike që do të udhëheqin institucionin gjatë pesë viteve të ardhshme.
Në këtë proces janë përfshirë anëtarët e Këshillit Drejtues, Rektori, prorektorët, dekanët e njësive akademike, Sekretari i Përgjithshëm, si dhe përfaqësues të zyrave relevante të universitetit, të cilët po kontribuojnë në ndërtimin e një vizioni të përbashkët për zhvillimin institucional.
Gjatë punimeve janë trajtuar një sërë prioritetesh kyçe, që lidhen me qeverisjen dhe menaxhimin institucional, avancimin e cilësisë në mësimdhënie dhe të nxënit, zhvillimin e kërkimit shkencor dhe inovacionit, ndërkombëtarizimin, mbështetjen e studentëve, transformimin digjital, zhvillimin e ekosistemit universitar dhe modernizimin e infrastrukturës.
Sipas universitetit, ky proces gjithëpërfshirës synon të forcojë bazat për një zhvillim të qëndrueshëm dhe afatgjatë, duke konsoliduar pozitën e UHZ-së si një institucion modern, inovativ dhe konkurrues në hapësirën evropiane të arsimit të lartë.
Plani Strategjik 2026-2030 do të shërbejë si dokumenti kryesor orientues për zhvillimin akademik, shkencor dhe institucional të universitetit, duke reflektuar përkushtimin e tij ndaj cilësisë, inovacionit, ndërkombëtarizimit dhe shërbimit ndaj studentëve dhe shoqërisë.
Universiteti “Haxhi Zeka” thekson se mbetet i përkushtuar ndaj një zhvillimi të profilizuar dhe të orientuar drejt sfidave dhe mundësive të së ardhmes.
