Universiteti i Prishtinës ka nderuar me titullin “Doctor Honoris Causa” kongresistin amerikan me origjinë shqiptare Joseph J. DioGuardi dhe veprimtaren Shirley Cloyes DioGuardi, në shenjë mirënjohjeje për kontributin e tyre të gjatë në mbështetje të Kosovës dhe të shqiptarëve.
Në ceremoninë solemne, rektori i Universitetit të Prishtinës, prof. Arben Hajrullahu, vlerësoi rolin e çiftit DioGuardi në ndërkombëtarizimin e çështjes së Kosovës dhe në sensibilizimin e institucioneve amerikane për situatën e shqiptarëve në ish-Jugosllavi.
Hajrullahu theksoi se DioGuardi dhe Cloyes DioGuardi nuk i kanë dhënë Kosovës vetëm mbështetje politike, por edhe “zë atëherë kur zëri i saj mezi dëgjohej”, si dhe mbështetje në periudha vendimtare të historisë së saj.
Misioni i senatorëve amerikanë në Prishtinë
Rektori përmendi si një nga momentet e rëndësishme të veprimtarisë së tyre 29 gushtin 1990, kur shtatë senatorë amerikanë, të udhëhequr nga senatori Robert J. Dole, vizituan Prishtinën në kuadër të një misioni faktmbledhës.
Sipas Hajrullahut, puna e Ligës Qytetare Shqiptaro-Amerikane, e udhëhequr nga Joseph dhe Shirley DioGuardi, luajti rol të rëndësishëm në informimin dhe sensibilizimin e opinionit dhe politikës amerikane për zhvillimet në Kosovë.
Ai vlerësoi gjithashtu këmbënguljen e tyre në institucionet amerikane, duke theksuar se ata ishin ndër zërat e hershëm që kërkuan një angazhim më të madh të Shteteve të Bashkuara për Kosovën.
Në fjalimin e tij, rektori rikujtoi edhe sloganin e njohur të Ligës:
“Pavarësi për Kosovën Tani – E Vetmja Rrugë Drejt Paqes në Ballkan.”
“Në Kosovë nuk jeni mysafirë”
Në fund të fjalimit, rektori Hajrullahu iu drejtua Joe dhe Shirley DioGuardi me një mesazh simbolik mirënjohjeje:
“Në Universitetin e Prishtinës derën do ta keni gjithmonë të hapur. Këtu, ashtu si kudo në Kosovë, nuk jeni mysafirë; jeni në shtëpinë tuaj.”
Dhënia e titullit “Doctor Honoris Causa” për çiftin DioGuardi vjen në kuadër të një ceremonie që synon të nderojë një kapitull të rëndësishëm të marrëdhënieve shqiptaro-amerikane dhe kontributin e tyre shumëvjeçar në promovimin e çështjes së Kosovës në Shtetet e Bashkuara.
