Në Gjykatën Themelore në Prishtinë pritet të vazhdojë sot procesi gjyqësor ndaj Jovan Viqentijeviq dhe Dragisha Viqentijeviq, të akuzuar për përfshirje në sulmin ndaj kanalit të Ibër-Lepencit, i ndodhur në nëntor të vitit 2023.
Dy të pandehurit edhe në këtë fazë të procesit kanë mohuar akuzat, duke u deklaruar të pafajshëm, njësoj si në paraqitjen e tyre të parë para gjykatës.
Sipas Prokurorisë Speciale të Kosovës, provat e siguruara gjatë hetimeve mbështesin dyshimet për përfshirjen e tyre në veprat penale për të cilat po ndiqen. Prokuroria ka deklaruar gjithashtu se hetimet kanë zbuluar elemente që, sipas saj, tregojnë për përfshirjen e institucioneve të Serbisë në organizimin dhe përgatitjen e sulmit.
Gjatë hetimeve janë konfiskuar armë, municion, pajisje ushtarake, mjete komunikimi dhe prova të tjera materiale. Sipas Prokurorisë, analizat forenzike, përfshirë testet e ADN-së dhe ekspertizat teknike, i lidhin të akuzuarit me vendin ku ndodhi shpërthimi.
Në anën tjetër, avokatët mbrojtës kanë kundërshtuar qëndrimin e Prokurorisë, duke kërkuar nga trupi gjykues një vlerësim të paanshëm të provave. Ata pretendojnë se aktakuza nuk përmban një përshkrim të qartë të veprimeve konkrete që u atribuohen klientëve të tyre.
Jovan dhe Dragisha Viqentijeviq, së bashku me Igor Dimoviqin, akuzohen për cenim të rendit kushtetues, kryerje të veprës terroriste dhe posedim të paautorizuar të armëve. Ndaj Jovan Viqentijeviqit rëndon edhe akuza për spiunazh.
Sulmi ndaj kanalit të Ibër-Lepencit, i kryer në fshatin Varagë të Zubin Potokut në nëntor 2023, shkaktoi dëmtime të konsiderueshme në një objekt me rëndësi jetike për furnizimin me ujë dhe energji elektrike në Kosovë.
Seanca e sotme pritet të përqendrohet në administrimin e provave dhe paraqitjen e argumenteve nga Prokuroria dhe mbrojtja, ndërsa është planifikuar të nisë në orën 10:00.
