Një person ka humbur jetën si pasojë e lëndimeve të rënda të marra në aksidentin mes një treni të udhëtarëve dhe një makine pune, që kishte ndodhur javën e kaluar në Klinë.
Sipas njoftimit të Policisë së Kosovës, aksidenti kishte ndodhur më 6 maj 2026, rreth orës 12:40, në fshatin Jagodë të Klinës, ku u përfshinë një tren i udhëtarëve dhe një makinë pune.
Menjëherë pas incidentit, njësitet policore kishin dalë në vendin e ngjarjes, ndërsa personi i lënduar ishte dërguar fillimisht në Spitalin Rajonal të Pejës për trajtim mjekësor. Për shkak të gjendjes së rëndë shëndetësore, ai më pas ishte transferuar në Qendrën Klinike Universitare të Kosovës (QKUK) në Prishtinë.
Policia bëri të ditur se më 13 maj 2026, rreth orës 03:50, është njoftuar se personi i lënduar nuk ka arritur t’u mbijetojë plagëve.
“Vdekjen e viktimës e ka konstatuar ekipi mjekësor”, thuhet në njoftimin zyrtar.
Lidhur me rastin është njoftuar Prokurori i Shtetit, i cili ka urdhëruar që trupi i pajetë të dërgohet në Institutin e Mjekësisë Ligjore (IML) në Prishtinë për obduksion.
Hetimet për zbardhjen e plotë të rrethanave të aksidentit janë duke vazhduar.
