Një arsenal armësh dhe municionesh është zbuluar nga autoritetet shqiptare gjatë kontrollit të një automjeti tip “Land Rover”, i cili ndodhej brenda një kontejneri në Portin e Durrësit që prej dhjetorit të vitit 2022. Në brendësi të mjetit, policia gjeti tre armë zjarri, përfshirë dy automatikë dhe një pistoletë, si dhe 1580 fishekë luftarakë të kalibrave të ndryshëm.
Hetimet zbuluan se automjeti kishte hyrë në Shqipëri përmes pikës kufitare të Morinës dhe kishte si destinacion përfundimtar Republikën Demokratike të Kongos. Sipas autoriteteve, kontejneri kishte mbetur në port për më shumë se dy vjet pa u përpunuar doganisht, pasi dërguesi nuk ishte paraqitur për të përmbushur procedurat ligjore.
Kontrolli i kontejnerit u urdhërua më 4 qershor 2025 nga Autoriteti i Degës së Doganës në Durrës. Gjatë inspektimit, forcat e Policisë Kufitare dhe ato të DVP Durrës konstatuan se armët ishin fshehur në një hapësirë të përshtatur brenda automjetit. Përveç armëve dhe fishekëve, u gjetën edhe 12 krehra për armë automatike dhe pistoletë.
Në bashkëpunim me autoritetet kosovare, policia shqiptare ka identifikuar si të dyshuar kryesor një shtetas 24-vjeçar nga Kosova, i identifikuar me inicialet Y. I. Ky shtetas është shpallur në kërkim ndërkombëtar për trafikim të armëve dhe municioneve.
Hetimet për këtë rast vijojnë në bashkëpunim të ngushtë me Policinë e Kosovës dhe autoritetet e tjera ligjzbatuese, me qëllim dokumentimin e plotë të rrjetit kriminal dhe identifikimin e të gjithë personave të përfshirë.
Ndërkohë, armët e sekuestruara do të dërgohen në Institutin e Policisë Shkencore për ekzaminime të thelluara teknike, balistike dhe daktiloskopike, për të përcaktuar nëse ato janë përdorur në ngjarje kriminale të mëparshme.
