Presidenti i Ukrainës, Volodymyr Zelenskyy, ka prezantuar të premten një kornizë të re bashkëpunimi rajonal me shtatë vende të tjera, në një përpjekje për të nxitur investimet, bashkëpunimin ekonomik dhe sigurinë në rajonin e Karpateve.
Nisma, e quajtur “Tetë Karpate” (C8), bashkon Ukrainën, Rumaninë, Serbinë, Poloninë, Sllovakinë, Republikën Çeke, Austrinë dhe Hungarinë, ndërsa në samit merr pjesë edhe Bashkimi Evropian.
Vendet pjesëmarrëse synojnë të bashkëpunojnë në fushat e sigurisë, energjisë, logjistikës, lidhjeve ekonomike ndërkufitare dhe mbështetjes për komunitetet lokale.
“Në të kaluarën, njerëzit shpesh i shikonin Karpatet kryesisht si një rajon turizmi, çështjesh klimatike dhe mbështetjeje për komunitetet lokale. Sot, Karpatet mund dhe duhet të bëhen një nga motorët kryesorë të rritjes ekonomike, investimeve dhe eksporteve të energjisë”, tha Zelenskyy gjatë ceremonisë së hapjes së samitit në Bukovel, në Ukrainën perëndimore.
Fushat prioritare të bashkëpunimit
Zelenskyy veçoi transportin dhe logjistikën, lëvizshmërinë ushtarake, mineralet kritike, si dhe tregtinë dhe investimet, si fusha prioritare të bashkëpunimit mes vendeve.
Sipas presidentit ukrainas, rajoni i Karpateve mund të shërbejë gjithashtu si një portë hyrëse për në tregun evropian për rrugët tregtare që vijnë nga Kaukazi Jugor dhe Azia përmes Detit të Zi.
Organizatorët e samitit thanë se rreth 90 projekte të përbashkëta, me një vlerë të përgjithshme prej rreth 9.4 miliardë eurosh, iu prezantuan investitorëve gjatë “Laboratorit të Investimeve” të zhvilluar në kuadër të samitit.
Pjesëmarrësit
Në samit morën pjesë, ndër të tjerë, kryeministri i Polonisë, Donald Tusk, presidenti i Serbisë, Aleksandar Vuçiç, dhe presidenti i Rumanisë, Nicușor Dan.
Pjesëmarrësit kanë qëndrime të ndryshme edhe për luftën në Ukrainë. Polonia dhe Rumania kanë qenë ndër mbështetësit e Ukrainës, ndërsa Hungaria, Serbia dhe Sllovakia kanë mbajtur qëndrime më të rezervuara dhe nuk kanë ofruar ndihmë të drejtpërdrejtë ushtarake për Kievin.
Megjithatë, nisma “Tetë Karpate” synon të krijojë një platformë të përbashkët për bashkëpunim ekonomik, energjetik, të sigurisë dhe infrastrukturës në një rajon që lidh Evropën Qendrore me Detin e Zi dhe më tej me Kaukazin dhe Azinë.
