Një revolucion i ri teknologjik
Pas më pak se dy dekadash që nga hyrja e telefonave inteligjentë në jetën tonë, shefi ekzekutiv i Meta-s, Mark Zuckerberg, parashikon fundin e tyre si pajisje kryesore. Në një intervistë për portalin The Verge, Zuckerberg tha se telefonat inteligjentë do të zëvendësohen nga një pajisje e re deri në vitet ’30 të këtij shekulli.
“Do të vijë një kohë kur telefoni juaj inteligjent do të mbetet në xhep për pjesën më të madhe të kohës,” tha Zuckerberg, duke vënë theksin te zhvillimi i syzeve inteligjente, një teknologji që ai e cilëson si revolucionare për masat.
Çfarë do të ofrojnë syzet inteligjente?
Meta, së bashku me kompani të tjera të teknologjisë, po zhvillon syze inteligjente që pritet të kenë një gamë të gjerë funksionesh, përfshirë:
- Fotografim dhe regjistrim video.
- Luajtje muzike dhe shfaqje video.
- Marrje e-mailesh dhe mesazhesh.
- Përkthim në kohë reale të tekstit dhe gjuhës.
- Udhëzim nëpër rrugë përmes realitetit të shtuar.
- Informacion të detajuar për objektet e shikuara.
- Matje biometrike si rrahjet e zemrës dhe presioni i gjakut.
Pajisja pritet të kombinohet me inteligjencën artificiale, duke e bërë më të sofistikuar dhe të dobishme. Ndryshe nga syzet e mëdha dhe të rënda që përdoren aktualisht për realitetin virtual, syzet inteligjente që përshkruan Zuckerberg do të jenë të ngjashme me ato të diellit, duke ruajtur estetikën dhe komoditetin.
Një ndryshim i ngjashëm me atë të kompjuterëve
Zuckerberg e krahasoi këtë ndryshim me kalimin nga kompjuterët në telefonat inteligjentë. “Të gjithë i kemi ende kompjuterët në shtëpi, por celularët janë pajisjet që përdorim më së shumti. Një ndryshim i ngjashëm pritet të ndodhë me smartfonët,” tha ai.
Sipas tij, një ose dy miliardë njerëz në mbarë botën tashmë mbajnë syze, gjë që do të lehtësojë përhapjen e teknologjisë së re. Ai beson se në dekadën e ardhshme, shumë prej këtyre individëve do të kalojnë në syze inteligjente.
Orion: Syzet inteligjente të Meta-s
Meta ka nisur zhvillimin e një linje të quajtur Orion. Prototipet e para janë testuar dhe u prezantuan për publikun në shtator, megjithatë një datë komerciale ende nuk është shpallur. Pengesat kryesore për realizimin e projektit në masë përfshijnë koston e lartë të prodhimit dhe sfidat me furnizimin me energji.
Një histori që mund të përsëritet?
Disa mund të kujtojnë përpjekjen e mëparshme të Google për syze inteligjente, e cila rezultoi një dështim. Por Zuckerberg është optimist se teknologjia e avancuar aktuale do të sjellë suksesin që Google nuk e arriti. Nëse kjo do të ndodhë, mbetet për t’u parë – me ose pa syze.
