Zvicra po shqyrton seriozisht mundësinë për të hequr dorë nga sistemi amerikan i mbrojtjes ajrore Patriot, për shkak të vonesave të mëdha në dorëzim.
Ministri i Mbrojtjes, Martin Pfister, konfirmoi se anulimi i kontratës është një opsion real, ndërsa pagesat për sistemin janë pezulluar deri në një njoftim të qartë nga Shtetet e Bashkuara mbi afatet e reja.
Zvicra kishte porositur pesë sisteme Patriot në vitin 2022, me plan që dorëzimi të niste këtë vit dhe të përfundonte deri në vitin 2028. Por prioriteti i SHBA-së për të mbështetur Ukrainën ka shtyrë ndjeshëm këto afate.
Situata u komplikua edhe më shumë pasi u raportua se fondet zvicerane, të destinuara për avionët luftarakë F-35A, janë përdorur për pagesa të lidhura me sistemin Patriot, duke ngritur shqetësime për menaxhimin financiar.
Autoritetet zvicerane paralajmërojnë se nëse pasiguria vazhdon, jo vetëm që marrëveshja për Patriot mund të anulohet, por mund të preket i gjithë bashkëpunimi ushtarak me SHBA-në në kuadër të programeve të armatimit.
