Një numër i madh qytetarësh të Ulqinit janë mbledhur sot në një protestë masive, kundër asaj që ata e konsiderojnë si “shitjen e Ulqinit”. Protesta është organizuar nga Komuna e Ulqinit, e cila kundërshton vendimin e qeverisë malazeze për dhënien e një pjese të bregdetit për investitorët arabë, duke theksuar se nuk janë përfshirë në procesin e vendimmarrjes dhe konsultimeve.
Sipas marrëveshjes së nënshkruar nga qeveria malazeze, një pjesë e bregdetit prej 12 kilometrash plazh do t’u jepet këtyre investitorëve për një periudhë prej 99 vjetësh. Ky vendim ka shkaktuar shqetësim të madh ndër qytetarët dhe përfaqësuesit e Komunës, të cilët janë të shqetësuar për pasojat që mund të ketë ky hap për zhvillimin e ardhshëm të qytetit dhe mbrojtjen e pasurive publike.
“Protesta organizohet si reagim ndaj tentativës për dhënien me qira dhe privatizimin e hapësirave publike bregdetare, përfshirë Plazhin e Madh – një pasuri e përbashkët dhe simbol identitar i Ulqinit dhe banorëve të tij”, thuhet në njoftimin e Komunës së Ulqinit.
Komuna njofton se në këtë protestë po marrin pjesë përfaqësues të të gjitha partive politike në Kuvendin e Komunës, shoqëria civile nga mbarë trevat, si dhe qytetarë të shumtë, të bashkuar për të mbrojtur pronën publike dhe të ardhmen e qytetit.
Për shkak të situatës së krijuar, është anuluar festimi zyrtar i Ditës së Ulqinit. Ndërkohë, mbledhja solemne e Kuvendit Komunal do të mbahet përpara qytetarëve, si pjesë e protestës.
