Avokati i Popullit i ka kërkuar Zyrës së Rregullatorit për Energji (ZRRE) që të pezullojë vendimin për rritjen e çmimit të energjisë elektrike, deri në përfundimin e hetimeve mbi ankesat e shumta të qytetarëve lidhur me këtë vendim.
Në një reagim zyrtar, institucioni i Avokatit të Popullit ka vlerësuar se vendimi për rritjen e tarifave cenon të drejtat themelore të njeriut, duke goditur më së shumti grupet më të cenueshme të shoqërisë, si familjet që jetojnë me ndihmë sociale. Sipas tij, rritja e çmimit të energjisë ka ndikim të drejtpërdrejtë në mirëqenien ekonomike të qytetarëve dhe rrezikon të thellojë pabarazitë sociale.
Avokati i Popullit ka shprehur shqetësim për mungesën e debatit publik dhe institucional rreth këtij vendimi, duke theksuar se ai është marrë në një periudhë boshllëku institucional, kur Kosova nuk kishte as Kuvend të konstituuar dhe as Qeveri të mandatuar.
“Qeveria e Kosovës, në përputhje me Ligjin për Energjinë Elektrike, ka për detyrë të garantojë interesin publik, qasje të barabartë dhe përfshirje sociale në politikat energjetike”, thuhet në deklaratë. Më tej, Avokati i Popullit ka kërkuar që vendime të tilla të merren vetëm kur institucionet janë plotësisht funksionale dhe në koordinim të plotë për të mbrojtur interesat e qytetarëve.
Ai ka theksuar se ZRRE, si institucion i pavarur, duhet të rrisë nivelin e transparencës, përgjegjësisë dhe bashkëpunimit me institucionet e tjera shtetërore, veçanërisht në vendimmarrje që prekin interesin publik në mënyrë të gjerë.
Thirrja për pezullimin e vendimit vjen vetëm pak ditë para hyrjes në fuqi të shtrenjtimit të paralajmëruar të energjisë elektrike. Sipas ZRRE-së, duke filluar nga 1 maji, tarifat e energjisë do të rriten me 16.1 për qind.
