Irani ka shpallur rihapjen e Ngushtica e Hormuzit për trafikun detar, por tensionet me Shtetet e Bashkuara mbeten të larta, pasi bllokada amerikane ndaj porteve iraniane vazhdon.
Ministri i Jashtëm iranian, Abbas Araghchi, deklaroi se kalimi për anijet tregtare është “plotësisht i hapur” për pjesën e mbetur të armëpushimit, por kjo deklaratë është vënë në pikëpyetje nga zyrtarë të tjerë në Teheran.
Kryetari i Parlamentit iranian, Mohammad Bagher Ghalibaf, reagoi ashpër ndaj deklaratave të Donald Trump, duke i cilësuar si “të rreme” pretendimet e tij dhe duke theksuar se, përderisa vazhdon bllokada amerikane, ngushtica nuk mund të konsiderohet plotësisht e hapur.
Në të njëjtën linjë, zëdhënësi i diplomacisë iraniane, Esmail Baghaei, deklaroi se statusi i Hormuzit përcaktohet “në terren, jo në rrjetet sociale”.
Nga ana tjetër, Trump e cilësoi zhvillimin si “një ditë të madhe dhe të shkëlqyer për botën”, por paralajmëroi se bllokada detare ndaj Iranit do të mbetet në fuqi derisa të arrihet një marrëveshje e plotë.
Presidenti amerikan u shpreh optimist se një marrëveshje përfundimtare mund të arrihet brenda 1-2 ditësh, duke pretenduar se “Irani ka rënë dakord për gjithçka”, përfshirë edhe çështje të ndjeshme si programi bërthamor – pretendime që janë mohuar nga pala iraniane.
Situata mbetet e paqartë dhe e brishtë, me deklarata kontradiktore nga të dyja palët, ndërsa zhvillimet në ditët në vijim pritet të jenë vendimtare për fatin e armëpushimit dhe stabilitetin në rajon.
