Presidenti i SHBA-së, Donald Trump, ka deklaruar se administrata amerikane do të publikojë së shpejti dokumente të reja lidhur me UFO-t, ose siç njihen zyrtarisht, fenomenet ajrore të paidentifikuara (UAP).
Duke folur në një aktivitet në Phoenix, Trump tha se procesi i deklasifikimit tashmë ka nisur dhe se “janë gjetur dokumente shumë interesante”, duke shtuar se publikimet e para do të dalin “shumë, shumë shpejt”.
Ky zhvillim vjen pasi më herët ai kishte udhëzuar Sekretarin e Mbrojtjes, Pete Hegseth, që të nisë publikimin e dosjeve që lidhen me jetën jashtëtokësore dhe fenomenet misterioze në hapësirë.
Debati mbi UFO-t është rikthyer fuqishëm në SHBA, sidomos pasi ish-presidenti Barack Obama deklaroi se “ka gjasa që atje jashtë të ketë jetë”, duke shtuar presionin ndaj institucioneve për më shumë transparencë.
Megjithatë, vetë Trump nuk ka konfirmuar nëse beson se këto fenomene kanë origjinë jashtëtokësore, ndërsa Pentagoni nuk ka dhënë ende detaje për përmbajtjen apo afatin e saktë të publikimit.
Raportet e mëparshme të Pentagonit kanë theksuar se, megjithëse janë analizuar qindra raste të UAP-ve, nuk ka prova të besueshme që ato lidhen me jetë nga planete të tjera. Shumica e rasteve janë shpjeguar si keqidentifikime të objekteve të zakonshme ose fenomeneve natyrore.
Ndërkohë, kritikët sugjerojnë se kjo temë mund të përdoret edhe për të zhvendosur vëmendjen nga çështje të tjera politike, duke e kthyer debatin për UFO-t në një betejë të re mes transparencës dhe spekulimit.
