Ministri për Evropën dhe Punët e Jashtme i Shqipërisë, Ferit Hoxha, ka zhvilluar një takim me ministrin e Jashtëm të Serbisë, Marko Gjuriq, në kuadër të Forumit Diplomatik të Antalias 2026.
Sipas Hoxhës, në takim u diskutua për avancimin e marrëdhënieve dypalëshe përmes dialogut konstruktiv dhe rritjes së bashkëpunimit ekonomik e tregtar, si faktorë kyç për zhvillim dhe stabilitet rajonal. Ai bëri të ditur se Serbia ka shprehur gatishmëri për hapjen e një Konsullate të Përgjithshme të Shqipërisë në Bujanoc.
Hoxha theksoi rëndësinë e forcimit të bashkëpunimit rajonal dhe shmangies së retorikave joproduktive, duke nënvizuar përkushtimin e Shqipërisë për një politikë të jashtme të qartë dhe orientim evropian.
Sa i përket Kosovës, ai rikonfirmoi qëndrimin e palëkundur të Shqipërisë se dialogu Kosovë–Serbi, i ndërmjetësuar nga Bashkimi Evropian, mbetet rruga e vetme drejt normalizimit dhe njohjes reciproke.
