Kryeministri Edi Rama ka bërë të ditur se banorët e prekur nga zjarri në pallatin pranë “Farmacisë 10” në Tiranë do të përfitojnë bonus qiraje dhe mbështetje nga bashkia deri në rikthimin në banesat e tyre.
Ai theksoi se ndërtesa e dëmtuar do të rindërtohet plotësisht nga ndërtuesi, ndërsa institucionet do të ndihmojnë familjet e prekura për të përballuar situatën pas dëmeve të mëdha.
Rama hodhi poshtë edhe pretendimet për cilësinë e ndërtimit, duke deklaruar se nga verifikimet paraprake rezulton se materialet kanë qenë të certifikuara dhe të importuara.
Sipas tij, zjarri nuk lidhet drejtpërdrejt me ndërtimin, ndërsa kritikoi ashpër komentuesit dhe “ekspertët pa licenca” që, siç u shpreh ai, dalin në këto raste me akuza të pabazuara.
Kryeministri garantoi se asnjë nga banorët nuk do të lihet pa mbështetje dhe se rikthimi në banesa të reja është prioritet.
