Irani ka dërguar një propozim të ri për rifillimin e negociatave me Shtetet e Bashkuara të Amerikës përmes ndërmjetësimit të Pakistanit, një zhvillim që ka ndikuar menjëherë në tregjet globale të energjisë.
Sipas agjencisë shtetërore iraniane IRNA, propozimi synon zhbllokimin e ngërçit në bisedimet për përfundimin e konfliktit, megjithëse detaje konkrete mbi përmbajtjen e tij nuk janë bërë publike.
Lajmi ka reflektuar menjëherë në tregjet ndërkombëtare, ku çmimet e naftës kanë shënuar rënie, pas rritjes së fortë të ditëve të fundit si pasojë e tensioneve dhe bllokimit të Ngushticës së Hormuzit.
Kjo rrugë detare strategjike, përmes së cilës kalon rreth 20% e furnizimit global me naftë dhe gaz, mbetet një pikë kyçe e krizës aktuale, ndërsa ndërhyrjet ushtarake dhe bllokadat kanë shtuar frikën për një krizë energjetike globale.
Zhvillimi është konfirmuar edhe nga zyrtarë në Islamabad, të cilët kanë bërë të ditur se përgjigjja e Iranit ndaj kushteve amerikane është dorëzuar dhe përfshin propozime për një raund të ri bisedimesh të drejtpërdrejta.
Ndërkohë, një armëpushim i përkohshëm është në fuqi që nga 8 prilli, por tensionet mbeten të larta. Raportimet për plane të mundshme sulmesh të reja nga administrata e Donald Trump kishin çuar çmimet e naftës në nivelin më të lartë të katër viteve.
Nga ana tjetër, Irani ka aktivizuar sistemet e mbrojtjes ajrore dhe po përgatitet për një përgjigje të mundshme ushtarake, ndërsa burime të paidentifikuara paralajmërojnë për një përshkallëzim të shpejtë të situatës në rajon.
Zhvillimet e fundit sinjalizojnë një përpjekje të re diplomatike, por edhe rrezikun e vazhdueshëm të përshkallëzimit në një nga zonat më të ndjeshme të botës.
