Ish-deputetja e Lidhja Demokratike e Kosovës, Janina Ymeri, ka akuzuar Albin Kurti dhe qeverinë e tij për mungesë strategjie në sektorin e energjisë, duke pretenduar se ka ekzistuar një agjendë për rritjen e importit të energjisë elektrike.
Në një deklarim në emisionin EURO n’T7, Ymeri tha se përzierja e politikës në vendimmarrje është dëshmuar edhe përmes një grupi në WhatsApp, ku sipas saj kanë qenë pjesë kryeministri Kurti, ministrja Artane Rizvanolli dhe këshilltari i saj, Milot Kelmendi.
Sipas Ymerit, përfshirja e zyrtarëve në procese joformale si komunikimet në WhatsApp tregon për mungesë të një strategjie të mirëfilltë dhe për ndikim të agjendave partiake në sektorin energjetik.
Ajo theksoi se politikat e ndjekura nga qeveria kanë çuar në rritje të ndjeshme të importit të energjisë, duke bërë që shpenzimet të arrijnë pothuajse në 1 miliard euro gjatë mandateve të fundit.
“Ky nivel nuk është rezultat vetëm i çmimeve në bursë, por edhe i rritjes enorme të sasisë së importuar”, u shpreh Ymeri.
Ajo shtoi se në praktikat ndërkombëtare, ndërhyrja e qeverisë në import të energjisë bëhet vetëm në raste emergjente, ndërsa sipas saj, në Kosovë kjo është kthyer në praktikë të zakonshme.
Deklaratat e Ymerit vijnë në një kohë debatesh të vazhdueshme për menaxhimin e sektorit energjetik dhe kostot e larta të energjisë për qytetarët.
