Shqipëria ka siguruar një vend në Finalen e Madhe të Eurovision Song Contest 2026, falë performancës mbresëlënëse të Alis Kallaçit me këngën “Nân” në natën e dytë gjysmëfinale të festivalit që po mbahet në Vjenë.
Këngëtari nga Shkodra elektrizoi skenën e madhe të Wiener Stadthalle me një interpretim emocional dhe vokalisht të fuqishëm, duke rrëmbyer duartrokitje të gjata nga publiku dhe duke fituar zemrat e miliona teleshikuesve në mbarë Europën.
Performanca e Alisit u karakterizua nga një skenografi moderne, efekte vizuale mbresëlënëse dhe një paraqitje artistike që e shndërroi “Nân” në një nga momentet më të spikatura të mbrëmjes.
Kualifikimi i Shqipërisë u prit me emocione të mëdha, teksa flamuri kuqezi u valëvit me krenari në arenën e Eurovisionit dhe në Green Room, duke simbolizuar mbështetjen e fortë për përfaqësuesin shqiptar.
Pas javësh vlerësimesh pozitive nga mediat ndërkombëtare dhe fansat e Eurovisionit, Alis konfirmoi pritshmëritë, duke e çuar Shqipërinë në natën finale të së shtunës, ku do të përballet me finalistët e tjerë për trofeun e edicionit të 70-të të festivalit.
10 shtetet që u kualifikuan nga gjysmëfinalja e dytë janë:
- Shqipëria – Alis – Nân
- Australia – Delta Goodrem – Eclipse
- Bullgaria – Dara – Bangaranga
- Çekia – Daniel Zizka – CROSSROADS
- Danimarka – Søren Torpegaard Lund – Før vi går hjem
- Malta – AIDAN – Bella
- Norvegjia – JONAS LOVV – YA YA YA
- Qipro – Antigoni – Jalla
- Rumania – Alexandra Căpitănescu – Choke me
- Ukraina – LELÉKA – Ridnym
Tashmë sytë e publikut shqiptar janë te finalja e madhe, me shpresën që “Nân” të shkojë edhe më larg dhe të sjellë një rezultat historik për Shqipërinë.
