Shtetet e Bashkuara kanë njoftuar një fond shtesë prej 1.8 miliardë dollarësh për programet humanitare të Kombeve të Bashkuara gjatë vitit 2026, duke e çuar në 3.8 miliardë dollarë totalin e financimit amerikan për këtë sektor.
Lajmi u bë i ditur nga ambasadori amerikan në OKB, Mike Waltz, gjatë një konference të përbashkët me kreun e operacioneve humanitare të OKB-së, Tom Fletcher, ku u theksua se ky financim vjen pas angazhimeve për reforma dhe rritje të efikasitetit në shpërndarjen e ndihmës.
“Falë angazhimit të qartë për reforma dhe progresit të arritur deri tani, jemi shumë të lumtur të njoftojmë këtë financim të ri për sektorin humanitar”, deklaroi Waltz.
Megjithatë, pavarësisht fondit të ri, kontributi amerikan mbetet dukshëm më i ulët krahasuar me vitet e kaluara. Sipas të dhënave të OKB-së, SHBA dha 11 miliardë dollarë në vitin 2024, ndërsa në vitin 2025 kjo shumë ra në 2.7 miliardë dollarë, megjithëse vendi mbeti donatori më i madh global.
Vendimi vjen në një kohë kur administrata e presidentit Donald Trump ka reduktuar ndjeshëm ndihmën e jashtme, duke kërkuar reforma të thella në organizatat ndërkombëtare.
Nga ana tjetër, OKB paralajmëron për një krizë të thellë humanitare globale. Organizata vlerëson se rreth 250 milionë njerëz kanë nevojë urgjente për ndihmë për shkak të konflikteve, katastrofave natyrore, epidemive dhe ndryshimeve klimatike.
Fillimisht, OKB kishte kërkuar 33 miliardë dollarë për vitin 2026, por për shkak të mungesës së fondeve, plani u reduktua në 23 miliardë dollarë, me synimin për të ndihmuar 87 milionë persona në rrezik ekstrem.
Aktualisht, ky plan është financuar vetëm pjesërisht, me 7.3 miliardë dollarë, duke mundësuar ndihmë për vetëm 14.4 milionë persona që nga fillimi i vitit.
Ndërkohë, SHBA vijon të ketë detyrime të papaguara ndaj OKB-së, me mbi 4 miliardë dollarë borxhe, përfshirë buxhetin e përgjithshëm dhe operacionet paqeruajtëse.
