Lidhja Demokratike e Kosovës (LDK) ka reaguar publikisht duke denoncuar atë që e cilëson si sulm të koordinuar digjital ndaj profileve zyrtare të kandidatit të saj për kryeministër.
Përmes një reagimi për media, LDK pretendon se sulmet janë realizuar përmes profileve të rreme, ndërhyrjeve të automatizuara dhe aktivitetit të sinkronizuar manipulativ, me qëllim krijimin artificial të perceptimit publik dhe ndërtimin e një fushate diskredituese politike.
Sipas këtij subjekti politik, bëhet fjalë për një ndërhyrje hibride në komunikimin publik dhe procesin demokratik në Kosovë.
“Përmes rrjeteve të profileve të rreme dhe aktivitetit të koordinuar po tentohet të ndërtohet paraprakisht infrastruktura propagandistike për sulme politike,” thuhet në reagimin e LDK-së.
Partia ka bërë të ditur se çështjen do ta adresojë sërish të premten në mëngjes në Policinë e Kosovës dhe institucionet përkatëse, duke kërkuar hetim serioz dhe urgjent për rastin.
LDK thekson se demokracia nuk duhet të cenohet nga manipulimet online dhe propaganda anonime, duke shtuar se pavarësisht këtyre zhvillimeve, komunikimi me qytetarët do të vazhdojë.
“Kosova nuk guxon të lejojë që debati demokratik të zëvendësohet me manipulim digjital. Asgjë nuk do ta ndalë komunikimin tonë me qytetarët,” thuhet në fund të reagimit.
