Kancelari gjerman Friedrich Merz ka lëshuar kritika të forta ndaj Shteteve të Bashkuara nën administratën e Donald Trump, duke deklaruar se Amerika nuk është më “vendi i mundësive” që dikur admirohej nga shumë europianë.
Gjatë një konference me të rinj katolikë në Würzburg, Merz tha se nuk do t’u rekomandonte më fëmijëve të tij të studionin apo të ndërtonin karrierën në SHBA, duke përmendur përçarjen e thellë sociale dhe klimën politike të tensionuar.
“Jam një admirues i madh i Amerikës, por për momentin admirimi im nuk po rritet. Sot nuk do t’i këshilloja fëmijët e mi të shkonin në SHBA për t’u arsimuar apo për të punuar, sepse është krijuar një klimë e caktuar sociale që është shqetësuese”, deklaroi Merz.
Kancelari gjerman theksoi se polarizimi politik në SHBA është rritur ndjeshëm, duke shtuar se edhe profesionistët më të kualifikuar po përballen me vështirësi për të siguruar punë.
Deklaratat e tij kanë ndezur reagime të menjëhershme nga kampi republikan amerikan. Richard Grenell, ish-ambasador i SHBA-së në Gjermani dhe një nga aleatët më të afërt të Donald Trump, e sulmoi ashpër Merz, duke e cilësuar si një lider pa drejtim politik.
“Gjermanët kanë një kancelar pa strategji, i kontrolluar nga media woke gjermane”, shkroi Grenell, duke ironizuar edhe qëndrimin e butë të Merz gjatë takimeve të mëparshme me Trump.
Reagim pati edhe nga opozita e djathtë ekstreme në Gjermani. Liderja e AfD-së, Alice Weidel, akuzoi Merz se po kritikon SHBA-në ndërsa, sipas saj, vetë po e çon Gjermaninë drejt krizës ekonomike dhe sociale.
Përplasja vjen në një moment kur marrëdhëniet mes Berlinit dhe Uashingtonit janë tensionuar ndjeshëm për shkak të dallimeve mbi Iranin, Ukrainën dhe politikat tregtare. Administrata Trump së fundmi ka njoftuar tarifa më të larta për automjetet europiane dhe reduktim të pranisë ushtarake amerikane në Gjermani.
Megjithatë, pavarësisht kritikave, Merz ka insistuar se partneriteti transatlantik mbetet i rëndësishëm, duke theksuar se Gjermania dhe SHBA duhet të ruajnë bashkëpunimin në kuadër të NATO-s.