Kryeministri , Albin Kurti, ka përkujtuar 27-vjetorin e zhdukjes së veprimtarit dhe intelektualit shqiptar, Ukshin Hoti, duke e cilësuar atë si një nga mendjet më të ndritura të shqiptarëve.
Kurti rikujtoi se më 16 maj 1999, Hoti u lirua nga burgu i Dubravës, por më pas u zhduk me dhunë nga aparati shtetëror serb, ndërsa fati i tij mbetet ende i pazbardhur.
“Më 16 maj 1999, profesor Ukshin Hoti u lirua nga burgu i Dubravës dhe më pas u zhduk me dhunë nga aparati shtetëror i Serbisë. Sot, pas 27 vjetësh, ende mbetet i pandriçuar fati i një prej mendjeve më të ndritura të shqiptarëve,” ka shkruar Kurti.
Ai theksoi se veprat dhe analizat politike të Hotit do të vazhdojnë të studiohen ndër breza.
Sipas Kurtit, trashëgimia intelektuale e Ukshin Hotit mbetet e gjallë dhe me peshë të veçantë në historinë politike shqiptare.
Për ta nderuar figurën e tij, Kurti tha se ka vizituar shtëpinë-muze të Ukshin Hotit në Krushë të Madhe, së bashku me djalin e tij, ministrin Andin Hoti, ku përkujtuan jetën dhe veprën e tij.
