Komanda e Forcave të Operacioneve Speciale të NATO-s ka publikuar fotografi nga stërvitjet e përbashkëta të Forcave Speciale shqiptare me instruktorët e Forcave Speciale të Shteteve të Bashkuara, duke vënë theksin te rritja e gatishmërisë operacionale përballë sfidave moderne të sigurisë.
Në njoftimin e publikuar në faqen zyrtare, NATO thekson se këto përgatitje janë thelbësore për të përballuar mjedisin gjithnjë e më kompleks të sigurisë globale.
“Përpara misionit vjen stërvitja. Përpara presionit vjen përgatitja. Përmes skenarëve të vështirë, Forcat e Operacioneve Speciale të NATO-s mprehin gatishmërinë, precizitetin dhe koordinimin e nevojshëm për të vepruar në mjedisin kompleks të sigurisë së sotme”, thuhet në deklaratë.
Sipas NATO-s, stërvitjet janë fokusuar në operacione taktike në terren të vështirë, lëvizje me profil të ulët, si dhe neutralizimin e kërcënimeve në kushte sa më afër realitetit operacional.
Në këtë trajnim morën pjesë Forcat e Operacioneve Speciale të Shqipërisë, në bashkëpunim me instruktorët amerikanë, në kuadër të forcimit të ndërveprueshmërisë dhe kapaciteteve mbrojtëse brenda aleancës.
Publikimi i këtyre pamjeve vjen në një kohë kur NATO po intensifikon përgatitjet dhe bashkëpunimin ushtarak mes vendeve anëtare, përballë zhvillimeve të ndjeshme në arenën ndërkombëtare.
