Kryetari i Kuvendit, Glauk Konjufca, ka reaguar pas raportimeve që, sipas tij, kanë shtrembëruar deklaratat e tij, duke theksuar se nuk ka pasur asnjë koment ndaj Presidentes Vjosa Osmani.
Konjufca tha se rrallëherë reagon ndaj lajmeve të rreme, por kësaj here, sipas tij, bëhet fjalë për një “luftë speciale” me qëllim kontaminimin e skenës politike.
Sipas tij, gjatë një tubimi në Ferizaj, një person që ai e quajti “pseudogazetar” përdori termin “frizere”, të cilin ai tha se e kundërshtoi për mënyrën përçmuese të përdorimit.
“Shumë vajza dhe gra në vendin tonë e bëjnë këtë punë fisnike dhe mbajnë familjet e tyre. Pikërisht për këtë, ky profesion është përfshirë edhe në programin e arsimit dual të inauguruar nga qeveria”, ka shkruar Konjufca.
Ai theksoi se diskutimi i tij kishte vetëm këtë kontekst dhe nuk lidhej në asnjë formë me Presidenten Osmani, duke akuzuar disa media se kanë prerë vetëm një pjesë të deklaratës për të krijuar një narrativë të rreme.
“Asnjë diskutim imi nuk ka pasur të bëjë me Presidenten Osmani. Mediat qëllimkëqija e prenë vetëm termin ‘frizere’ dhe ndërtuan një rrëfim të paqenë”, u shpreh ai.
Konjufca shtoi se raportet me Osmanin mbeten të bazuara në respekt të ndërsjellë dhe bashkëpunim të gjatë politik.
Në fund, ai kërkoi ndjesë ndaj kujtdo që mund të jetë lënduar nga ky, siç e quajti ai, “konstrukt i inxhinieruar”.
