Kryeministri në detyrë i Kosovës, Albin Kurti, ka deklaruar se serbët e Kosovës po përballen me presion dhe kërcënime të paprecedenta nga Beogradi për të votuar Listën Serbe, duke e cilësuar situatën si më të rëndën gjatë mandatit të tij.
Komentet e Kurtit erdhën pas arrestimit të shtatë personave në Graçanicë, të dyshuar për kërcënim dhe ushtrim presioni ndaj votuesve serbë.
“Kurrë nuk ka pasur kaq shumë trysni nga Beogradi, kërcënime, shantazhe dhe kushtëzime financiare ndaj serbëve të Kosovës për t’u rreshtuar me Listën Serbe”, deklaroi Kurti.
Ai tha se institucionet e Kosovës kanë pranuar ankesa të shumta nga qytetarët serbë lidhur me presionin politik, duke shtuar se Beogradi po monitoron madje edhe aktivitetin në rrjetet sociale të figurave publike dhe politikanëve serbë në Kosovë.
Sipas Kurtit, qëllimi i Serbisë është ndikimi politik dhe krijimi i strukturave paralele brenda Kosovës.
“Serbia vazhdimisht mundohet të krijojë dualizma institucionalë brenda territorit tonë, përmes elementeve të saj. Këto janë veprime ilegale në shtetin tonë të pavarur”, u shpreh ai.
Kurti theksoi se institucionet e drejtësisë dhe prokurorisë po veprojnë në mënyrë të pavarur dhe kanë mbështetjen e plotë të Qeverisë për zbatimin e ligjit.
Ai nënvizoi se ndalimet dhe hetimet nuk lidhen me përkatësinë etnike, por me dyshimet për veprime të kundërligjshme që cenojnë procesin demokratik.
