Qeveria në detyrë e Republikës së Kosovës ka mbajtur sot mbledhjen e radhës, ku ka miratuar një sërë vendimesh që lidhen me mbështetjen sociale, zhvillimin ekonomik dhe avancimin institucional.
Një nga vendimet kryesore ishte miratimi i Pakos për Përballje me Inflacionin 2.0, e cila synon të lehtësojë barrën financiare të qytetarëve përmes mbështetjes së drejtpërdrejtë për kategori të ndryshme.
Sipas vendimit të miratuar, përfitues do të jenë:
- Përfituesit e skemave pensionale, përmes mbështetjes së njëhershme;
- Fëmijët që përfitojnë nga skema e shtesave për fëmijë;
- Të gjithë të punësuarit me të ardhura mujore nën 1000 euro, të deklaruar gjatë muajit prill dhe që nuk paguhen nga buxheti i shtetit;
- Studentët aktivë dhe të rregullt të vitit akademik 2025/2026 në institucionet e arsimit të lartë në Kosovë, të cilët plotësojnë kriteret e përcaktuara.
Në kuadër të mbështetjes sociale, Qeveria ka ndarë gjithashtu 1 milion euro për zbatimin e Masës 3.4 – “Kuponë ushqimi për familjet në nevojë”, në kuadër të Pakos së Ringjalljes Ekonomike.
Ndërkaq, në fushën e zhvillimit ekonomik dhe industrial janë miratuar kërkesa për shpallje të interesit publik për bartjen e pronës komunale për zhvillimin e Parkut Industrial dhe Teknologjik në Komunën e Gjilanit, si dhe është shqyrtuar kërkesa për shpronësim të pronave ish-shoqërore “Virgjinia” dhe “Metaliku”, të cilat preken nga ndërtimi i Zonës Industriale në Gjakovë.
Po ashtu, Qeveria ka miratuar:
- Raportin vjetor mbi Inspektimet;
- Emërimin e Komisionit të Pranimit për pozitën e Drejtorit Ekzekutiv të Agjencisë së Investimeve dhe Eksportit;
- Emërimin e Komitetit për Partneritet Publiko-Privat.
Sipas ekzekutivit, këto vendime synojnë forcimin e mbështetjes sociale, zhvillimin ekonomik dhe përmirësimin e funksionimit institucional në vend.
