Komisionerët e Bashkimit Evropian po shfaqin pakënaqësi lidhur me përdorimin e automjeteve elektrike gjatë udhëtimeve zyrtare drejt Strasburgut, pasi automjetet nuk arrijnë të përballojnë të gjithë distancën pa ndalesa për karikim.
Sipas një raportimi të Politico, anëtarë të ekipit të presidentes së Komisionit Evropian, Ursula von der Leyen, po përballen me vonesa të përsëritura për shkak të nevojës për të ndaluar në Luksemburg për rimbushjen e baterive.
Udhëtimi nga Brukseli drejt Strasburgut, që përfshin rreth 440 kilometra, zgjat zakonisht rreth pesë orë. Megjithatë, automjetet elektrike kërkojnë një ndalesë shtesë prej 20 deri në 30 minutash për karikim, duke e zgjatur kohën totale të udhëtimit.
Sipas zyrtarëve të disa kabineteve të komisionerëve, kjo situatë është kthyer në një burim pakënaqësie në rritje, sidomos për shkak të angazhimeve të ngjeshura dhe lëvizjeve të shpeshta drejt Parlamentit Evropian.
Ankesat kanë rikthyer në diskutim edhe sfidat më të gjera të tranzicionit të gjelbër. Kritikët argumentojnë se infrastruktura aktuale dhe autonomia e automjeteve elektrike ende nuk janë në nivelin e nevojshëm për të përballuar plotësisht kërkesat praktike.
Aktualisht, rreth 80 për qind e flotës së Komisionit Evropian është elektrike, pjesë e planit për ta bërë flotën me emetime zero deri në vitin 2027. Megjithatë, disa zyrtarë kanë vënë në pikëpyetje efektivitetin e disa modeleve për udhëtime të gjata.
Një alternativë e përmendur për të shmangur karikimin është lëvizja me shpejtësi më të ulët për të kursyer baterinë, por sipas zyrtarëve kjo mund ta zgjasë udhëtimin deri në shtatë orë.
