Presidenti i Federata Shqiptare e Futbollit, Armand Duka, ka zbuluar detaje të reja mbi kontratën e trajnerit të ri të Kombëtares shqiptare, Rolando Maran, duke sqaruar edhe spekulimet që kanë qarkulluar rreth pagës së tij.
Në një intervistë për emisionin “TAR”, Duka deklaroi se Maran ka një pagë në të njëjtin nivel me paraardhësin e tij, Sylvinho, madje sipas tij mund të jetë edhe me një përqindje të vogël më e lartë.
“Kam dëgjuar këto ditë lloj-lloj abuzimesh. Federata mori këtë, uli nivelin, rriti buxhetin. Nuk kam preferuar ndonjëherë të flas për marrëdhëniet financiare me trajnerët apo stafet. Paga e Maran është e njëjtë me Silvinjon, mbase ndonjë përqindje më shumë”, deklaroi Duka.
Ai hodhi poshtë raportimet që flisnin për shifra shumë të larta, duke sqaruar se as Sylvinho nuk ka përfituar ndonjëherë pagë prej 1 apo 2 milionë eurosh në vit.
“Ka pasur abuzime: ‘Silvinjo merrte 1 milion apo 2 milionë euro’. Janë në të njëjtat nivele, as Silvinjo nuk ka marrë asnjëherë 1 milion”, u shpreh ai.
I pyetur nëse paga e trajnerit të ri është nën 1 milion euro në vit, Duka u përgjigj shkurt: “Po, patjetër”.
Megjithatë, nga deklaratat e presidentit të FSHF-së kuptohet se Maran mund të jetë trajneri më i paguar në historinë e Kombëtares shqiptare, edhe pse shifra e saktë nuk është bërë publike.
