Presidenti i Rusisë, Vladimir Putin, ka lëshuar një paralajmërim të fortë ndaj vendeve të NATO-s, duke deklaruar se Moska disponon të gjitha kapacitetet e nevojshme për të shkatërruar çdo forcë që do të tentonte të sulmonte enklavën strategjike ruse të Kaliningrad.
Deklarata u bë në përgjigje të komenteve të ministrit të Jashtëm të Lituania, Kestutis Budrys, i cili kishte deklaruar më herët se NATO duhet t’i tregojë Moskës se është në gjendje të depërtojë në Kaliningrad në rast nevoje.
“Rusia ka në dispozicion të gjitha mjetet e nevojshme për të shkatërruar këdo që përpiqet të sulmojë Kaliningradin”, deklaroi Putin.
Moska: Çdo kërcënim ndaj Rusisë është objektiv legjitim
Duke komentuar raportimet e inteligjencës ruse se Ukraina ka vendosur operatorë dronësh në territorin e Letonisë, Putin përsëriti se çdo rajon apo objekt që paraqet kërcënim për sigurinë e Rusisë do të konsiderohet objektiv legjitim ushtarak.
Megjithatë, kreu i Kremlinit tha se Moska mbetet e gatshme të vazhdojë negociatat për një zgjidhje paqësore të luftës në Ukrainë, edhe pse refuzoi të japë një afat konkret për përfundimin e konfliktit.
Putin hodhi poshtë gjithashtu pretendimet perëndimore se Rusia po përgatitet për një konflikt me Evropën, duke i cilësuar ato si “gënjeshtra”.
“Rusia nuk ka kërcënuar kurrë dhe nuk kërcënon vendet evropiane”, tha ai.
NATO konfirmon: Droni që goditi Rumaninë ishte rus
Ndërkohë, tensionet janë rritur edhe pas incidentit të ndodhur në Rumania, ku një dron u përplas me një ndërtesë banimi në qytetin Galați, duke plagosur dy persona.
Putin deklaroi se ishte ende herët për të përcaktuar origjinën e dronit dhe sugjeroi se ai mund të ishte ukrainas.
Megjithatë, NATO ka dalë me një qëndrim të qartë. Zëdhënësi i Komandës Supreme Aleate në Evropë, Martin O’Donnell, konfirmoi se droni kishte origjinë ruse.
Edhe ambasadori amerikan në NATO, Matthew Whitaker, dënoi incidentin, duke e cilësuar atë si një “inkursion të rrezikshëm” në territorin e Aleancës.
“SHBA do të mbrojë çdo centimetër të territorit të NATO-s”, deklaroi Whitaker.
Nga ana tjetër, Sekretari i Përgjithshëm i NATO, Mark Rutte, theksoi se sjellja e Rusisë përbën një rrezik serioz për sigurinë euroatlantike.
Pas incidentit, presidenti rumun Nicusor Dan njoftoi masa diplomatike ndaj Moskës, duke bërë të ditur mbylljen e konsullatës ruse në qytetin e Konstancës dhe dëbimin e konsullit rus nga vendi.
Ngjarja konsiderohet si një nga incidentet më serioze të muajve të fundit që prek drejtpërdrejt territorin e një shteti anëtar të NATO-s, në një kohë kur lufta në Ukrainë vazhdon të rrisë tensionet mes Rusisë dhe Perëndimit.
