Me urdhër të ministrit të Brendshëm të Shqipërisë, Besfort Lamallari, Ikballe Huduti është shpallur person i padëshiruar (non grata) në Shqipëri për një periudhë prej 15 vitesh.
Sipas autoriteteve shqiptare, vendimi bazohet në informacione të grumbulluara nga institucionet e sigurisë, sipas të cilave veprimtaria e saj vlerësohet si kërcënim për sigurinë kombëtare, rendin dhe sigurinë publike.
Urdhri i Ministrisë së Brendshme i është përcjellë për zbatim Policia e Shtetit dhe strukturave të Drejtorisë së Kufirit.
Edi Rama: Predikon urrejtje dhe thërret për kryengritje
Gjatë ditës, kryeministri i Shqipërisë, Edi Rama, reagoi publikisht për përfshirjen e Hudutit në protestat e mbajtura në Tirana.
Ai publikoi një fotografi të saj me ish-presidentin iranian Mahmoud Ahmadinejad, duke e cilësuar këtë të fundit si “kryeshërbëtorin famëkeq të ajatollahëve”.
Sipas Ramës, Huduti ka bërë thirrje publike kundër rendit kushtetues në Shqipëri dhe ka promovuar retorikë urrejtjeje.
“Shikojini vetë dy fotot. Është i njëjti personazh që në emër të Allahut predikon urrejtje, thërret për kryengritje ndaj qeverisë së Shqipërisë dhe kërkon hakmarrje ndaj Amerikës,” shkroi Rama.
Kujtojmë se në vitin 2020, Ikballe Huduti ishte arrestuar në Kosovo pasi kishte bërë thirrje për hakmarrje ndaj United States pas vrasjes së gjeneralit iranian Qasem Soleimani.
Reagon Huduti: Nuk kam çfarë të humb
Pas vendimit, Ikballe Huduti reagoi në rrjetet sociale, duke thënë se nuk ka më asgjë për të humbur.
Ajo deklaroi se ka humbur vetëm frikën ndaj “zullumqarëve” dhe se poshtërimeve që, sipas saj, i janë bërë nga pushtetarë dhe figura fetare, duhet t’u vijë fundi.
“Më e mirë për mua është një vdekje me vlera dinjitoze sesa një jetë me poshtërime,” shkroi ajo.
Huduti shtoi se misioni i saj lidhet me mbrojtjen e drejtësisë dhe lirisë njerëzore, duke kërkuar gjithashtu lutje dhe mbështetje nga ndjekësit e saj.
