Irlanda merr Presidencën e BE-së: fokus në ekonomi, siguri dhe mbrojtje të demokracisë

Nga 1 korriku, Irlanda ka marrë për gjashtë muaj Presidencën e radhës të Këshillit të Bashkimit Evropian, duke vendosur në qendër të agjendës forcimin e ekonomisë evropiane, mbrojtjen e demokracisë dhe rritjen e sigurisë së qytetarëve. Në një artikull të posaçëm për gazetën “Panorama”, Kryeministri i Irlandës, Micheál Martin, ka prezantuar prioritetet e presidencës irlandeze, duke theksuar se Bashkimi Evropian duhet të bëhet më konkurrues, më i bashkuar dhe më i përgatitur për sfidat globale. Sipas tij, qëllimi kryesor është që politikat evropiane të sjellin përfitime konkrete në jetën e përditshme të qytetarëve, përmes rritjes ekonomike, forcimit të sigurisë energjetike dhe kibernetike, mbështetjes për Ukrainën, avancimit të procesit të zgjerimit të BE-së dhe mbrojtjes së vlerave themelore të Unionit. Irlanda do të përqendrohet në rritjen e konkurrueshmërisë së ekonomisë evropiane, duke mbështetur bizneset, krijimin e vendeve të reja të punës dhe uljen e kostove për qytetarët. Një nga prioritetet kryesore është zbatimi i strategjisë së BE-së “Një Evropë, një treg”, e cila synon thjeshtimin e rregullave, integrimin më të thellë të tregut të përbashkët, forcimin e tregtisë, uljen e çmimeve të energjisë dhe zhvillimin e transformimit digjital dhe inteligjencës artificiale. Sipas Kryeministrit Martin, ulja e barrierave burokratike dhe thellimi i tregut të përbashkët do të ndihmojnë në uljen e çmimeve të produkteve dhe shërbimeve në mbarë Evropën, duke përfituar veçanërisht ndërmarrjet e vogla dhe të mesme. Shtylla e dytë e presidencës fokusohet në mbrojtjen e demokracisë, barazisë dhe të drejtave të njeriut. Irlanda synon forcimin e mbrojtjes së konsumatorëve dhe të drejtave themelore, në një kohë kur dezinformimi dhe sfidat teknologjike po rriten ndjeshëm. Një prioritet i veçantë mbetet siguria e fëmijëve në hapësirën online. Një tjetër prioritet kyç i presidencës irlandeze është mbështetja për Ukrainën, përmes ndihmës politike, ekonomike, diplomatike dhe ushtarake. Po ashtu, Irlanda mbështet zgjerimin e Bashkimit Evropian, duke e konsideruar atë një faktor të rëndësishëm për stabilitetin dhe mirëqenien në kontinent. Presidenca do të përqendrohet edhe te siguria në kuptimin e gjerë, përfshirë sigurinë energjetike, mbrojtjen kibernetike dhe përballjen me kërcënimet hibride. BE-ja synon të rrisë qëndrueshmërinë ndaj krizave globale, duke garantuar furnizim të qëndrueshëm me energji dhe mbrojtje më të fortë të sistemeve digjitale dhe të dhënave të qytetarëve. Një nga sfidat kryesore të presidencës do të jetë avancimi i negociatave për buxhetin afatgjatë të Bashkimit Evropian, i cili financon fusha të rëndësishme si infrastruktura, bujqësia, inovacioni, kërkimi shkencor dhe politikat klimatike. Irlanda synon arritjen e një marrëveshjeje brenda këtij viti, edhe pse procesi pritet të kërkojë kompromis mes shteteve anëtare. Duke iu referuar motos së presidencës “Ní neart go cur le chéile” (“Nuk ka forcë pa unitet”), Kryeministri Martin thekson se sfidat e sotme globale nuk mund të zgjidhen nga shtetet veç e veç, por vetëm përmes bashkëpunimit të përbashkët evropian. Sipas tij, suksesi i presidencës do të matet jo me deklarata politike, por me përmirësime konkrete në jetën e përditshme të qytetarëve të Bashkimit Evropian.