Anglia e ka mbyllur Kupën e Botës 2026 në vendin e tretë, pasi mposhti Francën me rezultatin 6-4 në një nga ndeshjet më spektakolare të këtij edicioni. Përballja për vendin e tretë prodhoi plot 10 gola, ritëm të lartë dhe emocione deri në sekondat e fundit.
“Tre Luanët” e nisën ndeshjen në mënyrë perfekte. Në minutën e 3-të, Declan Rice zhbllokoi rezultatin me një goditje të fuqishme nga distanca, ndërsa në minutën e 18-të asistoi për Ezri Konsa, i cili dyfishoi epërsinë me kokë.
Dominimi anglez vazhdoi edhe në pjesën e parë. Marcus Rashford shërbeu për Bukayo Saka, që realizoi golin e tretë në minutën e 37-të. Në kohën shtesë të fraksionit të parë, Saka shënoi edhe një herë për ta dërguar Anglinë në pushim me një epërsi të thellë 4-0.
Franca reagoi menjëherë pas rikthimit nga dhomat e zhveshjes. Kylian Mbappé shënoi në minutën e 48-të pas asistimit të Michael Olise, ndërsa vetëm gjashtë minuta më vonë Bradley Barcola ngushtoi diferencën në 4-2.
Mbappé realizoi sërish në minutën e 66-të, duke e çuar rezultatin në 4-3 dhe duke rikthyer shpresat për një përmbysje.
Megjithatë, Anglia reagoi në momentin vendimtar. Në minutën e 85-të, pas një penalltie të fituar nga Djed Spence, Bukayo Saka realizoi nga pika e bardhë dhe kompletoi tripletën personale për rezultatin 5-3.
Franca nuk u dorëzua. Në minutën e gjashtë të shtesës, Ousmane Dembélé shënoi për 5-4, por vetëm dy minuta më vonë Jude Bellingham vulosi fitoren me një aksion individual fantastik, duke vendosur rezultatin përfundimtar 6-4.
Rekorde historike
Michael Olise përfundoi turneun me 7 asistime, duke vendosur një rekord të ri në historinë e Kupës së Botës dhe duke kaluar rekordin e mëparshëm të Pelés, i cili kishte regjistruar gjashtë asistime në Botërorin e vitit 1970.
Edhe pse Franca u mposht, Kylian Mbappé vazhdoi të shkruajë histori. Me dy golat ndaj Anglisë, ai arriti në 22 gola në Kupat e Botës, duke kaluar Lionel Messin në renditjen historike. Sulmuesi francez e mbyll turneun me 10 gola, duke kryesuar garën për “Këpucën e Artë”.
Nga ana tjetër, Jude Bellingham u bë lojtari i parë anglez që shënon shtatë gola në një edicion të vetëm të Kupës së Botës, ndërsa Anglia siguroi rezultatin e saj më të mirë në Botëror që nga triumfi historik i vitit 1966.
Për Francën, kjo ishte ndeshja e fundit e Didier Deschamps si përzgjedhës, me Zinedine Zidane që pritet të marrë drejtimin e “Bluve”.
Ndeshjet me 10 ose më shumë gola në historinë e Kupës së Botës
- 1954: Austri – Zvicër 7-5
- 1938: Brazil – Poloni 6-5
- 1954: Hungari – Gjermani 8-3
- 1982: Hungari – El Salvador 10-1
- 1958: Francë – Paraguaj 7-3
- 2026: Francë – Angli 4-6
