Një rrjet i dyshuar i trafikimit të emigrantëve që vepronte në Ballkan është goditur gjatë një operacioni të koordinuar nga autoritetet e Greqisë, Bullgarisë, Holandës dhe Rumanisë, me mbështetjen e Europol. Aksioni çoi në arrestimin e shtatë personave të dyshuar.
Operacioni u zhvillua më 16 korrik në Selanik, Athinë, Sofje, Bukuresht dhe Etten-Leur të Holandës. Sipas Europol, pesë persona u arrestuan në Greqi, një në Bullgari dhe një në Holandë.
Hetimet kanë në shënjestër një grup të organizuar kriminal, i përbërë kryesisht nga shtetas sirianë dhe egjiptianë, i cili dyshohet se organizonte transportin e paligjshëm të emigrantëve nga Greqia, përmes Bullgarisë dhe Rumanisë, me destinacion përfundimtar Italinë.
Autoritetet bëjnë të ditur se emigrantët ishin kryesisht shtetas të Egjiptit, Irakut dhe Sirisë. Ata transportoheshin fillimisht me automjete të vogla nëpër Ballkan dhe më pas transferoheshin në kamionë për fazën e fundit të udhëtimit drejt Italisë.
Sipas hetimeve, grupi përdorte automjete me qira, makina të regjistruara në emër të personave të tretë ose kompanive fiktive, si dhe automjete të vjedhura, kryesisht në Greqi. Makinat me qira siguroheshin duke përdorur dokumente identifikimi të vërteta ose të falsifikuara dhe më pas nuk ktheheshin.
Deri më tani, autoritetet e lidhin këtë rrjet me 12 raste të trafikimit të emigrantëve të regjistruara nga shkurti deri në korrik 2026, ndërsa katër raste të tjera të mëparshme vazhdojnë të hetohen.
Europol njoftoi se gjatë operacionit ka koordinuar shkëmbimin e informacionit mes vendeve pjesëmarrëse dhe ka dërguar në Greqi një ekspert me zyrë të lëvizshme për verifikime në kohë reale në bazat e të dhënave të agjencisë.