Deputeti i Lidhjes Demokratike të Kosovës (LDK), Armend Zemaj, ka akuzuar Qeverinë për, sipas tij, dështim në realizimin e investimeve kapitale në sektorin e shëndetësisë.
Në një reagim publik, Zemaj tha se gjatë gjashtëmujorit të parë të këtij viti janë realizuar më pak se 2% e investimeve kapitale në shëndetësi, duke e cilësuar këtë si vazhdimësi të performancës së dobët të viteve të kaluara.
“Kur pacientët kanë nevojë për shërbime më të mira, kushte dinjitoze, pastërti dhe barna, qeveria e paaftësisë dhe e mashtrimit, vetëm në gjashtë muajt e parë të këtij viti, ka realizuar më pak se 2% të investimeve kapitale në shëndetësi, pothuajse njësoj si në vitet e kaluara”, ka deklaruar Zemaj.
Ai shtoi se, sipas vlerësimit të tij, në sektorin e shëndetësisë mungojnë investimet dhe angazhimi për përmirësimin e kushteve për pacientët dhe personelin shëndetësor.
Në të njëjtën kohë, Zemaj pretendoi se shpenzimet për luks, reprezentacion dhe udhëtime kanë arritur nivele rekord, ndërsa akuzoi qeverinë edhe për rritje të tenderëve me një burim, emërime familjare dhe, sipas tij, trefishim të kostos së barnave dhe materialit shpenzues.
Deri më tani nuk ka pasur reagim nga Qeveria apo Ministria e Shëndetësisë lidhur me këto pretendime.
