Inspektorati Qendror i Punës ka urdhëruar ndalimin e menjëhershëm të punimeve në 16 vendpunishte në komunat e Pejës, Prishtinës, Ferizajt, Lipjanit dhe Fushë Kosovës, pas konstatimit të shkeljeve të rënda të legjislacionit për sigurinë dhe shëndetin në punë.
Sipas njoftimit zyrtar, gjatë inspektimeve të realizuara janë evidentuar parregullsi që paraqisnin rrezik serioz për jetën dhe shëndetin e punëtorëve.
Për këtë arsye, inspektorët kanë urdhëruar pezullimin e punimeve deri në eliminimin e të gjitha mangësive dhe krijimin e kushteve të sigurta të punës, në përputhje me kërkesat ligjore.
Inspektorati thekson se rifillimi i punimeve do të lejohet vetëm pasi të verifikohet se janë përmbushur të gjitha standardet e sigurisë dhe detyrimet ligjore.
Në njoftim bëhet e ditur se kontrollet intensive do të vazhdojnë në të gjithë territorin e Republikës së Kosovës, duke theksuar se nuk do të ketë tolerancë ndaj shkeljeve që rrezikojnë jetën dhe shëndetin e punëtorëve.
