Kryeministri i Shqipërisë, Edi Rama, do të mbledhë sot Grupin Parlamentar të Partisë Socialiste dhe kabinetin qeveritar në Pallatin e Brigadave, në një takim që do të nisë në orën 09:30.
Sipas axhendës, mbledhja do të hapet nga kryetari i Kuvendit, Niko Peleshi, i cili do të paraqesë një bilanc mbi punën e Kuvendit, përdorimin e teknologjisë në funksionimin e institucionit, si dhe planet për godinën e re të Kuvendit.
Më pas, kryetari i Grupit Parlamentar të PS-së, Taulant Balla, do të prezantojë raportin mbi aktivitetin e deputetëve gjatë këtij sesioni parlamentar, me fokus punën në komisionet parlamentare dhe pjesëmarrjen në seancat plenare.
Rama: “Thirrja ‘Rama, jepe dorëheqjen’ më ekzalton”
Në përmbyllje të mbledhjes pritet të mbajë fjalën kryeministri Edi Rama.
Një mbrëmje më parë, Rama publikoi në rrjetet sociale një video ku shfaqej duke përgatitur fjalimin e tij, ndërsa në sfond dëgjoheshin protestuesit që thërrisnin “Rama, jepe dorëheqjen”. Kryeministri reagoi me ironi, duke deklaruar se kjo thirrje e “ekzalton”.
Ai paralajmëroi gjithashtu se në mbledhje do të ndajë reflektimet e tij mbi atë që e quajti “pasqyra e bulevardit të flamingove”.
Axhenda e mbledhjes
- 09:30 – Hapja e mbledhjes.
- Niko Peleshi – Bilanci mbi drejtimin e Kuvendit dhe zhvillimet institucionale.
- Taulant Balla – Raporti për punën e Grupit Parlamentar të PS-së gjatë sesionit.
- Edi Rama – Fjala përmbyllëse e mbledhjes.
