Policia e Kosovës ka njoftuar se më 24 dhe 25 korrik 2026 do të zbatohen masa të veçanta për menaxhimin e trafikut për shkak të një koncerti që do të mbahet në Prishtina Mall.
Sipas njoftimit, masat do të jenë në fuqi nga ora 16:00 deri në përfundim të aktivitetit, ndërsa qytetarët ftohen të planifikojnë lëvizjet e tyre për të shmangur pritjet dhe kolonat.
Rekomandimet e Policisë
- Qytetarët që udhëtojnë në relacionin Prishtinë – Shkup dhe Shkup – Prishtinë këshillohen të përdorin Autostradën “Arbën Xhaferi”, me qëllim shmangien e ngarkesave në trafik.
- Për pjesëmarrësit në koncert do të organizohen autobusë falas të Trafikut Urban, të cilët do të qarkullojnë në linjën Prishtinë – Prishtina Mall – Prishtinë.
Ndryshime në qarkullimin e automjeteve
Policia ka bërë të ditur se do të ketë riorganizim të trafikut në afërsi të Prishtina Mall:
- Për automjetet që lëvizin nga Prishtina në drejtim të Prishtina Mall, pas rrethrrotullimit të Marigonës, do të vendosen kona në shiritin e majtë të rrugës, i cili do të rezervohet për vizitorët e koncertit.
- Për automjetet që vijnë nga Ferizaj, do të vendosen kona në shiritin e djathtë, ndërsa hyrja për vizitorët do të bëhet përmes rrugicës në të djathtë, para rrethrrotullimit të Prishtina Mall.
Policia e Kosovës u bën thirrje qytetarëve të tregojnë mirëkuptim, të respektojnë udhëzimet e zyrtarëve policorë dhe sinjalizimin e përkohshëm rrugor, në mënyrë që të sigurohet zhvillimi i qetë i aktivitetit dhe mbarëvajtja e trafikut.
