Kryeministri në detyrë i Kosovës, Albin Kurti, ka pritur sot në takim të Dërguarin e Posaçëm të Bashkimit Evropian për dialogun Kosovë–Serbi, Peter Sorensen, me të cilin ka diskutuar zhvillimet në procesin e dialogut, marrëdhëniet me Bashkimin Evropian dhe situatën në rajonin e Ballkanit Perëndimor.
Sipas njoftimit të Qeverisë së Kosovës, gjatë takimit u shqyrtua momenti aktual i dialogut dhe perspektiva e vazhdimit të procesit të normalizimit të marrëdhënieve ndërmjet Kosovës dhe Serbisë.
Kurti ritheksoi se Kosova mbetet e përkushtuar ndaj një qasjeje konstruktive në dialog, duke synuar paqe të qëndrueshme, siguri euro-atlantike, stabilitet afatgjatë dhe marrëdhënie të mira fqinjësore në përputhje me vlerat evropiane.
Çështja e gjyqtarëve dhe prokurorëve serbë
Një nga temat e diskutimit ishte edhe çështja e kthimit të prokurorëve dhe gjyqtarëve serbë që kishin dhënë dorëheqje nga institucionet e Kosovës.
Sipas Qeverisë, Kurti i tha Sorensenit se çdo proces i rikthimit duhet të respektojë plotësisht Kushtetutën dhe ligjet e Kosovës.
Ai theksoi se institucionet e Kosovës duhet të mbeten shumetnike, me përfaqësim të të gjitha komuniteteve, ndërsa punësimi në polici, gjyqësor dhe prokurori duhet të bazohet në kompetencën profesionale dhe integritetin etik.
Kurti shtoi se dorëheqjet kolektive të zyrtarëve serbë në veri, të ndodhura katër vite më parë, kishin për synim, sipas tij, cenimin e karakterit shumetnik të institucioneve të Kosovës.
U diskutua edhe Marrëveshja e Brukselit
Gjatë takimit u trajtuan edhe tema të tjera që lidhen me procesin e dialogut, ku u theksua rëndësia e respektimit dhe zbatimit të Marrëveshjes Bazike të Brukselit dhe Aneksit të Zbatimit të Ohrit, si bazë për avancimin e procesit të normalizimit të marrëdhënieve ndërmjet Kosovës dhe Serbisë.