Qeveria e Kosovës ka deklaruar se rikthimi i pjesëtarëve të komunitetit serb në institucionet shtetërore nuk mund të bëhet përmes vendimeve politike, por vetëm në përputhje me Kushtetutën dhe legjislacionin në fuqi.
Në një reagim publik, Qeveria rikujtoi se dorëheqjet masive të zyrtarëve serbë nga institucionet e Republikës së Kosovës, në fund të vitit 2022, ishin të organizuara dhe të motivuara politikisht, duke i cilësuar ato si fillimin e një sërë veprimesh sabotuese ndaj shtetit.
Sipas Qeverisë, në atë periudhë ishte bërë thirrje që zyrtarët serbë të mos largoheshin nga institucionet, por tani kthimi i tyre nuk mund të imponohet nga ekzekutivi.
“Kishim të drejtë politike t’ju themi, mos shkoni. Por nuk kemi të drejtë kushtetuese e ligjore t’ju themi, kthehuni. Kthimi është çështje ligjore dhe kushtetuese”, thuhet në reagim.
Qeveria thekson se nuk mund të ketë rikthim që anashkalon Kushtetutën dhe ligjin, veçanërisht kur largimi ishte, sipas saj, një akt që cenoi rendin kushtetues dhe ligjshmërinë.
Në deklaratë bëhet e ditur se dorëheqjet janë trajtuar tashmë nga Policia e Kosovës dhe së fundmi edhe nga Këshilli Prokurorial i Kosovës, ndërsa pritet që edhe Këshilli Gjyqësor i Kosovës ta shqyrtojë këtë çështje.
Qeveria njoftoi se mbledhja e fundit e Këshillit Gjyqësor dështoi për shkak të mungesës së kuorumit, por shprehu pritjen që në mbledhjen e ardhshme kjo çështje të marrë një epilog në përputhje me ligjin.
