Qendra Kombëtare për Menaxhim Kufitar ka publikuar gjendjen aktuale të fluksit në pikat e kalimit kufitar të Republikës së Kosovës.
Sipas të dhënave të fundit, shumica e pikave kufitare kanë pritje të shkurtra dhe qarkullim normal, ndërsa ngarkesa më e madhe paraqitet në pikën kufitare Dheu i Bardhë.
Në këtë pikë, për automjetet që hyjnë në Kosovë pritja është rreth 50 minuta, me kolonë prej 200 metrash.
Gjendje me pritje të moderuara raportohet edhe në:
- Hani i Elezit – rreth 10 minuta pritje në hyrje, me kolonë prej 30 metrash.
- Kullë – pritje nga 5 deri në 10 minuta në të dy drejtimet.
- Muçibabë – pritje nga 5 deri në 10 minuta.
- Vërmicë – pritje nga 5 deri në 10 minuta.
Në pikat tjera kufitare, përfshirë Bërnjakun, Glloboqicën, Jarinjen, Merdarën, Mutivodën, Qafë e Morinës, Qafë e Prushit dhe Stançiqin, pritjet janë kryesisht nga 3 deri në 5 minuta, pa kolona të regjistruara.
Për kamionët, sipas raportit, nuk ka pritje të konsiderueshme dhe kolonat janë zero metra në të gjitha pikat kufitare.
Qendra Kombëtare për Menaxhim Kufitar vazhdon monitorimin e fluksit dhe rekomandon që udhëtarët të kontrollojnë gjendjen e pikave kufitare para nisjes, sidomos gjatë orëve me ngarkesë më të madhe.
