Komandanti i misionit të KFOR-it, gjeneralmajor Özkan Ulutaş, ka pritur në selinë e KFOR-it në Kampin Film City në Prishtinë ambasadorin e Turqisë në Kosovë, Sabri Tunç Angılı, në vizitën e tij lamtumirëse me rastin e përfundimit të mandatit diplomatik.
Sipas njoftimit të KFOR-it, takimi shërbeu si një mundësi për t’i shprehur mirënjohjen ambasadorit Angılı për bashkëpunimin dhe mbështetjen e ofruar gjatë mandatit të tij.
Gjeneralmajor Ulutaş vlerësoi bashkëpunimin me ambasadorin turk dhe i uroi suksese në angazhimet e tij të ardhshme.
KFOR theksoi se vazhdon të kryejë misionin e tij për të kontribuar në një mjedis të sigurt dhe të qetë për të gjithë qytetarët e Kosovës, si dhe për të garantuar lirinë e lëvizjes, duke bashkëpunuar ngushtë me Policinë e Kosovës dhe misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse në fushën e sigurisë.
