Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve që gjatë ditëve me temperatura të larta të tregojnë kujdes të shtuar për veten dhe për personat më të rrezikuar.
Në një apel publik, IKSHPK rekomandon që qytetarët të jenë të vëmendshëm ndaj shenjave të goditjes nga nxehtësia dhe të kërkojnë menjëherë ndihmë mjekësore nëse shfaqen simptoma si marramendje, të përziera, konfuzion ose djersitje e tepërt.
Instituti gjithashtu këshillon:
- Të kontaktoni të paktën një herë në ditë të moshuarit që jetojnë vetëm.
- Të mos i lini fëmijët vetëm në automjete të parkuara, qoftë edhe për pak minuta.
- Të kujdeseni për hidratimin dhe të shmangni ekspozimin e panevojshëm në diell gjatë orëve më të nxehta të ditës.
IKSHPK thekson se kujdesi i ndërsjellë është veçanërisht i rëndësishëm gjatë valëve të të nxehtit, pasi reagimi i shpejtë ndaj shenjave të rrezikut mund të parandalojë pasoja serioze për shëndetin.
