Presidenti amerikan Donald Trump thuhet se ka shprehur dëshirën që zëvendëspresidenti J.D. Vance të jetë kandidati i Partisë Republikane në zgjedhjet presidenciale të vitit 2028, sipas një raportimi të gazetës The Washington Post.
Sipas mediumit amerikan, Trump e ka bërë këtë koment gjatë një takimi privat me donatorë në Zyrën Ovale rreth dy javë më parë.
“Përfundimisht, duhet të zgjedhim JD-në”, mësohet të ketë thënë Trump, sipas dy burimeve të njohura me bisedën, të cilat kanë folur në kushte anonimiteti.
Raporti thekson se, ndërsa shprehte mbështetjen për Vance, Trump ka diskutuar gjithashtu me bashkëpunëtorët e tij për një garë të mundshme mes zëvendëspresidentit dhe sekretarit amerikan të Shtetit, Marco Rubio, për nominimin republikan.
Një zyrtar i Shtëpisë së Bardhë ka konfirmuar se presidenti ka biseduar me stafin edhe gjatë një udhëtimi me helikopterin presidencial Marine One, ku ka kërkuar mendime për të dy politikanët.
Sipas The Washington Post, këto komente sugjerojnë se Trump mund të jetë i gatshëm të mbështesë publikisht Vance, megjithëse disa prej këshilltarëve të tij theksojnë se presidenti ende nuk ka marrë një vendim përfundimtar.
Gara brenda republikanëve mbetet e hapur
Komentet e raportuara bien në kontrast me deklaratat publike të Trump gjatë muajve të fundit, ku ai ka shmangur të favorizojë hapur një kandidat, duke vlerësuar si J.D. Vance, ashtu edhe Marco Rubio si figura të rëndësishme të Partisë Republikane.
Burime pranë presidentit kanë deklaruar se Trump shpesh diskuton emra të ndryshëm përpara se të marrë një vendim përfundimtar dhe se ai ka prirjen të mbajë të hapur garën mes kandidatëve potencialë.
Një këshilltar i afërt me presidentin ka pohuar se Trump e sheh Vance si pasardhësin e tij politik, por ka shtuar se është ende herët për të folur për një mbështetje zyrtare apo për shpalljen e kandidaturës.
Shumë do të varet nga zgjedhjet afatmesme
Analistët vlerësojnë se dinamika brenda Partisë Republikane mund të ndryshojë pas zgjedhjeve afatmesme të nëntorit. Nëse republikanët nuk arrijnë rezultatet e pritura, mund të shfaqen kandidatë të tjerë për nominimin presidencial, duke e bërë garën më të hapur.
Ndërkohë, Trump ka lënë herë pas here të kuptohet se do të dëshironte një mandat të tretë presidencial, megjithëse një mundësi e tillë nuk lejohet nga Kushtetuta e Shteteve të Bashkuara.
Për momentin, nuk ka asnjë konfirmim zyrtar nga Shtëpia e Bardhë apo nga vetë Donald Trump lidhur me një mbështetje formale për kandidatin republikan të zgjedhjeve presidenciale të vitit 2028.