Autoritetet italiane kanë goditur një rrjet të dyshuar të trafikut të drogës, duke zbuluar një rafineri kokaine në qytetin e Latinës. Në operacion janë arrestuar pesë persona, mes tyre edhe një shtetas shqiptar.
Sipas karabinierëve, gjatë kontrollit në një banesë në rrugën Pennacchi u sekuestruan 18 pako me rreth 18.2 kilogramë kokainë, 8,810 euro para të gatshme, një makinë për numërimin e parave, telefona celularë, një kompjuter portativ, orë luksoze, bizhuteri, dokumente me shënime të aktivitetit kriminal, si dhe një pistoletë me ajër të kompresuar, një shkop teleskopik dhe një elektroshok.
Hetimet vijuan në ambientet e jashtme të pronës, ku karabinierët zbuluan një laborator të fshehur për përpunimin e kokainës mes bimësisë së dendur.
Brenda laboratorit u gjetën pajisje për rafinimin dhe paketimin e drogës, përfshirë peshore precize, sita, furra me mikrovalë, makina paketimi me vakum dhe presa për formimin e pakove të drogës.
Gjithashtu u sekuestruan:
- Dy kova me 8.8 kilogramë kokainë në proces rafinimi;
- Sasi të mëdha substancash përzierëse;
- 27 thasë me pellet druri, secili nga 15 kilogramë, që dyshohet se përdoreshin për fshehjen dhe transportimin e lëndës narkotike;
- Tretës kimikë dhe pajisje për nxjerrjen e kokainës nga pelleti.
Sipas autoriteteve, në total janë sekuestruar rreth 28 kilogramë kokainë.
Zona u izolua menjëherë, ndërsa specialistët e RIS-it të Romës kryen ekspertiza për të përcaktuar metodën e përdorur për nxjerrjen e drogës dhe sasinë e lëndës narkotike që ndodhej ende në proces përpunimi.
Përveç shtetasit shqiptar, në pranga përfunduan edhe dy italianë, një shtetas holandez dhe një kolumbian. Hetimet për identifikimin e personave të tjerë të përfshirë në rrjetin e trafikut të drogës janë ende në vazhdim.