Ministria e Infrastrukturës dhe Transportit ka njoftuar se të enjten do të ketë kufizime të përkohshme të qarkullimit në autoudhë për automjetet e transportit të mallrave me masë totale mbi 20 tonë.
Sipas njoftimit të ministrisë, masa është marrë bazuar në parashikimin zyrtar të temperaturave, të cilat pritet të arrijnë ose të tejkalojnë 32 gradë Celsius.
Kufizimi në autoudhë do të jetë në fuqi nga ora 11:00 deri në 17:30. Gjatë kësaj periudhe, automjetet e transportit të mallrave mbi 20 tonë nuk do të lejohen të qarkullojnë në autoudhë.
Ndërkaq, në rrugët nacionale, rajonale dhe lidhëse, qarkullimi i këtyre automjeteve do të lejohet pa kufizime.
Nga masa përjashtohen automjetet e organeve të rendit dhe sigurisë publike, shërbimeve emergjente dhe institucioneve shëndetësore.
Ministria e Infrastrukturës dhe Transportit u ka bërë thirrje operatorëve ekonomikë dhe ngasësve që ta respektojnë kufizimin dhe ta planifikojnë qarkullimin në përputhje me orarin e përcaktuar.
