Pensionet në Austri pritet të rriten sërish në vitin 2027, por rritja do të jetë më e ulët se norma e inflacionit. Kjo nënkupton se pensionistët mund të përballen me humbje të fuqisë blerëse, ndërsa për shkak të lehtësimit të barrës tatimore pritet të ketë rritje edhe të pensioneve neto.
Parashikimet aktuale e vendosin inflacionin për këtë vit në rreth 3.5 për qind. Megjithatë, për shkak të situatës së vështirë buxhetore, rritja e pensioneve për vitin 2027 pritet të jetë më e ulët dhe jo e njëjtë për të gjithë pensionistët.
Sipas përllogaritjeve të publikuara nga Finanz.at, pensionet deri në 1,308 euro bruto në muaj pritet të rriten me 3.3 për qind. Pensionet deri në 6,930 euro bruto në muaj do të marrin një rritje prej 2.95 për qind, ndërsa për pensionet mbi këtë shumë rritja do të jetë një shumë fikse prej rreth 204 eurosh bruto në muaj.
Kjo do të thotë se rritja maksimale do të jetë rreth 2,862 euro bruto në vit.
Sa do të rriten pensionet?
Përllogaritjet e Finanz.at japin këto shembuj për pensionet bruto mujore:
| Pensioni bruto në 2026 | Pensioni bruto në 2027 | Rritja |
|---|---|---|
| 1,300 € | 1,342.90 € | +42.90 € |
| 1,500 € | 1,544.25 € | +44.25 € |
| 1,750 € | 1,801.63 € | +51.63 € |
| 2,000 € | 2,059.00 € | +59.00 € |
| 2,500 € | 2,573.75 € | +73.75 € |
| 3,500 € | 3,603.25 € | +103.25 € |
| 5,000 € | 5,147.50 € | +147.50 € |
| 7,000 € | 7,204.44 € | +204.44 € |
Finanz.at ka publikuar gjithashtu një kalkulator për pensionet e vitit 2027, i cili merr parasysh rritjen e pensionit bruto dhe ndryshimet në tatimin mbi të ardhurat. Kështu, pensionistët mund të përllogarisin edhe shumën e re neto që pritet të marrin nga viti i ardhshëm.
Ndryshojnë edhe pragjet e tatimit
Një faktor tjetër që pritet të ndikojë në pensionet neto është rritja e pragjeve të tabelës së tatimit mbi të ardhurat me 2.27 për qind.
Sipas të dhënave të publikuara, në vitin 2027 pragu pa tatim do të rritet nga 13,539 në 13,846 euro në vit. Pragu për normën 20 për qind do të shkojë nga 21,992 në 22,491 euro, ndërsa ai për normën 30 për qind nga 36,458 në 37,285 euro.
Pragu për normën 40 për qind do të rritet nga 70,365 në 71,960 euro, ndërsa ai për normën 48 për qind nga 104,859 në 107,236 euro. Për të ardhurat mbi 1 milion euro do të vazhdojë të zbatohet norma prej 55 për qind.
Pra, edhe pse rritja e pensioneve pritet të jetë më e ulët se inflacioni, ndryshimet në tatim mund të ndikojnë pozitivisht në shumën neto që pensionistët do të marrin në vitin 2027.
Për pensionistët në Austri, shuma përfundimtare do të varet nga pensioni individual bruto dhe nga rregullat tatimore që do të zbatohen gjatë vitit të ardhshëm.
